10 ел эчендә «Игелекле Казан» АКбО 11 меңнән артык мохтаҗ кешегә ярдәм күрсәткән

Узган елда «Игелекле Казан» опекасы астында 4 меңнән артык кеше булган, ә 10 ел эчендә оешма 11 меңнән артык мохтаҗга ярдәм иткән. Аларның 300 дән артыгы – әле инвалидлык статусын рәсмиләштермәгән, әмма шуңа да карамастан тернәкләндерү чаралары һәм кирәкле тәрбия алган түшәктә ятып авырган кешеләр. Проект поликлиникалар аша Казанның Сәламәтлек саклау идарәсе белән берлектә тормышка ашырылды.

Хәзерге вакытта «Игелекле Казан» АКбО биш эре юнәлеш буенча 15 хәйрия проектын гамәлгә ашыра, 134 фондны һәм инициативаны, 2 меңнән артык волонтерны берләштерә. 10 ел эчендә «Игелекле Казан» ярдәмендә коммерцияле булмаган оешмалар гомуми суммасы 230 миллион сумнан артык финанс ярдәме алган, шул исәптән Президент грантлары фондыннан.

2017 елдан сәламәтлек мөмкинлекләре чикләнгән балаларны тәрбиягә алучы гаиләләргә төзелгән шартнамәнең гамәлдә булу вакытын билгеле бер чорга озайту мөмкинлеге булган өч елга түләүсез муниципаль фатирлар бирелә. Ә 2018 елның 1 гыйнварыннан шәһәр Думасы карары белән инвалид балалы гаиләләр милеккә салымнан азат ителде.

2022 елдан «Игелекле Казан» эгидасы астында шәһәрдә мөмкинлекләре чикләнгән балалар өчен инклюзив ял итү үзәкләре һәм укыту-күнекмәләр фатирлары челтәре үсеш ала. Аларда махсус белем алган педагоглар һәм тьюторлар эшли. Бүгенге көндә дүрт инклюзив үзәк, биш укыту-күнекмәләр фатиры һәм менталь тайпылышлары булган ятим балалар өчен өй шартларында яшәүне тәэмин итүгә юнәлдерелгән чаралар комплексы булган бер фатир ачылды. Шулардан өч инклюзив үзәк (Ипподром ур., 18, Голубятников ур., 24 – укыту-күнекмәләр фатиры белән – һәм Юдино бистәсендә) һәм Минск урамындагы укыту-күнекмәләр фатиры узган ел ачылды. Бер ел эчендә булдырылган киңлекләр 4 меңнән артык баланы колачларга мөмкинлек бирә.

2022 елда 49 нчы мәктәп каршында инклюзив кластер булдыру башланды: бүген ул «МастерОК» иҗади ял итү үзәген һәм сәламәтлек мөмкинлекләре чикләнгән балалар өчен спорт комплексын үз эченә ала.

Шулай ук 2022 елда «Игелекле Казан» коворкингы булдырылды, аның базасында 2024 елда шәһәрнең коммерцияле булмаган оешмалары тарафыннан 1,5 меңнән артык төрле чаралар үткәрелгән. Психологик һәм юридик ярдәм колл үзәкләр көче белән күрсәтелә, алар 33 меңнән артык шалтырату кабул иткән.

Шәһәрнең инклюзив үзәкләре һәм «Игелекле Казан» коворкингы базасында «Ак Барс Созидание», «Ярдәм» хәйрия фондлары һәм «Азык-төлек һәм социаль туклану департаменты» белән берлектә менталь тайпылышлары булган балалар өчен көндезге лагерьлар оештырыла, аларда инде 315 бала өчен 21 атналык смена уздырылган.

2022 елның көзендә коворкинг базасында МО хәрбиләренең гаиләләренә ярдәм итү буенча штаб булдырылды. Бу вакыт эчендә МХО зонасына һәм яңа төбәкләргә 2000 тоннадан артык гуманитар йөк илтү оештырылды.

2023 елдан аз хәрәкәтләнүче кешеләр өчен «Игелекле такси» проекты эшли, анда инде 2 меңнән артык сәфәр кылынган. Такси республика буенча гына түгел, ДЦП булган балаларны Чабаксардагы травматология һәм ортопедия федераль үзәгенә тернәкләндерү өчен дә йөртә.

Инвалид балалар тәрбияләүче ялгыз аналар өчен «Социаль няня» проекты кысаларында 350 дән артык хатын-кыз ярдәм алды.

Инклюзияне үстерү өчен инфраструктура шәһәрнең спорт, мәдәният һәм яшьләр учреждениеләрендә булдырыла, бүген әлеге учреждениеләрнең 70% ы сәламәтлек мөмкинлекләре чикләнгән кешеләр өчен ачык.

Мәктәп укучыларында шәфкатьлелек һәм мәрхәмәтлелек тәрбияләү инде сигез ел беренче сыйныф укучылары өчен «Игелекле эшләр көндәлеге» һәм «Игелек ярминкәләре» аша гамәлгә ашырыла. 2024 елда ярминкәләрдә 162 мәктәптән, 309 балалар бакчасыннан һәм 49 өстәмә белем бирү учреждениесеннән балалар катнашты. Барлык вакыт эчендә «Игелек ярминкәләре»нә 50 меңнән артык кеше килгән, 10 млн сумнан артык акча җыелган.

Быел Казанда сәламәтлек мөмкинлекләре чикләнгән затлар өчен илдә иң эре тернәкләндерү үзәге ачылачак. Ул «Ярдәм» бердәм комплексының состав өлеше булачак, аңа инде спорт үзәге һәм Луи Брайль системасы буенча язуга һәм укуга өйрәтү мәктәбе керә. Исегезгә төшерәбез, «Дан» уникаль спорт үзәге, анда көн саен 500 гә кадәр кеше күнегүләр ясый ала, шул исәптән 15 спорт төре буенча паралимпиячеләр дә, 2022 елда ачылды.

Ә узган 2024 елда Серов урамында сәламәтлек мөмкинлекләре чикләнгән кешеләр өчен тулысынча җайлаштырылган республикада беренче инклюзив бульвар ачылды. 2025 елда паркны төзекләндерү дәвам итәчәк.

Моннан тыш, 2025 елда ТР башкаласында сәламәтлек мөмкинлекләре чикләнгән кешеләр ял итсен өчен, Локомотив һәм Аккош пляжларын төзекләндерү планлаштырыла.

Быел «Игелекле Казан» – Татарстан башкаласын үстерүнең өстенлекле проектларының берсе – 10 еллык юбилеен билгеләп үтә. Аның максаты – кешенең мал-мөлкәте һәм сәламәтлеге нинди булуына карамастан, шәһәр халкына белем алу, спорт, иҗат белән шөгыльләнү өчен тигез мөмкинлекләр тудыру, шулай ук катлаулы тормыш хәлләрендә аерым кешеләргә ярдәм күрсәтү. «Игелекле Казан»ның иң эре проектлары булып хәйриячелек өлкәсендә иң яхшы тәҗрибәләр белән алмашу өчен «Игелекле Казан» төбәкара форумы һәм 2017 елда Казан мэры Илсур Метшин һәм Россиянең халык артисты, композитор Игорь Крутой инициативасы белән оештырылган «Игелекле дулкын» Бөтенроссия балалар иҗаты мәдәни-хәйрия фестивале тора.