Быел Казанда капиталь ремонт программасы буенча 226 йорт яңартылачак

Быел Казанда Торак фондын капиталь ремонтлау программасы буенча 226 йорт яңартылачак, 67,7 мең кешенең тормышы яхшырачак. Эшкә инде 15 күпфатирлы йортларда керештеләр, анда лифт җиһазлары алыштырыла. Бу хакта Казан мэры Илсур Метшин үткәргән күчмә киңәшмәдә билгеле булды. Ул шулай ук Иске Татар бистәсендәге Гаспринский урамындагы 31 нче йортның торышын карап чыкты һәм халыкка быел йортның фасады, түбәсе, инженерлык коммуникацияләре һәм подъездлары төзәтеләчәген хәбәр итте.

«Йорт алай ук иске түгел, аңа нибары 30 яшь, гадәттә без программа белән 50-60 ел элек төзелгән күпфатирлы йортка керәбез, әмма, күрәсең, шулай «яхшы» төзегәннәр. Без хәзер яшәүчеләрнең йортның яңа фасадын килештерүләрен, аларга берничә вариант тәкъдим итүләрен телибез. Яшәүчеләр соравы буенча без бюджетны арттырачакбыз һәм фасад белән түбәдән тыш, инженерлык коммуникацияләрен һәм подъездны да ремонтлаячакбыз. Узган ел без 179 йортны ремонтладык, быел – 226. Бригадаларның эшләре күбрәк булачак, ләкин алар булдырыр дип ышанам. Сыйфатны күзәтәчәкбез», — диде шәһәр башлыгы.

Гасприснкий урамындагы 31 нче йортны этаплап төзегәннәр, дүрт подъездның һәркайсын 1994 елдан 1996 елга кадәр төзегәннәр. Капиталь премонт буенча аларны ремонтлаячаклар, шулай ук диварларны җылытырга планлаштыралар, чөнки минуслы температурада алар өшиячәк. Эшчеләр шулай ук йортның штукатуркасын, керү төркемнәренең нигезләрен яңартачаклар.

Күпфатирлы йортта «Иске шәһәр» ИК көче белән еш кына ямау үткәрелүгә карамастан, түбә ага. Проблеманы хәл итү өчен түбәгә капиталь ремонт ясалачак. Өстәмә рәвештә йортта үзәк җылылык, электр, һава торышын көйләү төене, су белән тәэмин итү һәм су үткәрү үткәреләчәк. Барлык эшләр тәмамланганда подъездлар ремонтланачак.

«Без капиталь ремонт ясаганда һәрьяклап ярдәм итәчәкбез. Иң мөһиме, аны быел ук уздырачаклар», — диде йортта яшәүче Наталья Шилина. Ул шәһәр башлыгына йорт яны территориясен ремонтлауны сорап мөрәҗәгать иткән. Бүгенге көндә юлларда һәм тротуарларда чокырлар күп.

«Быел без йортны капиталь төзекләндерәчәкбез, шуңа күрә ишегалдында төзелеш техникасы күп булачак. Бер эш икенчесенә комачауламасын өчен, без республика программасы белән киләсе елда ук сезнең ишегалдына киләчәкбез», – дип ышандырды Илсур Метшин. Шулай итеп, йорт яны территориясен «Безнең ишегалды» республика программасына кертәчәкләр, аның буенча эшләр 2026 елда башкарылачак.

Гаспарский урамындагы йортны капиталь ремонтлауга сату-алу үткәргәннән һәм подряд оешмасын билгеләгәннән соң керешергә планлаштыралар. Барлык эшләрне сентябрьгә тәмамлау планлаштырыла. Яхшыртулар күпфатирлы йортның 87 кешесенә кагылачак.

Торак фондын капиталь ремонтлау программасы башланганнан бирле, 2008 елдан башлап, Казанда 4,2 меңнән артык йорт яңартылган. 1329 объектта тулы эшләр башкарылган. Быел барлыгы 226 йорт ремонтланачак. Авиатөзелеш һәм Яңа Савин районнарында – 58, Вахитов һәм Идел буе районнарында – 49, Киров һәм Мәскәү районнарында – 38, Совет районнарында 81 күпфатирлы йортлар яңартылачак. Программа буенча сезонлы эшләрне 15 августка кадәр башкару планлаштырыла, күпфатирлы йортка капиталь ремонт агымдагы елның 1 декабренә кадәр тәмамланачак.

Капиталь ремонт буенча 91 күпфатирлы йортта төзелеш-монтаж эшләре башкарылачак. Тагын 135ендә күтәрү платформалары алыштырылачак. Бүгенге көндә «Лифт-Строй Компания» ҖЧҖ эшчеләре кабиналарны 15 күпфатирлы йортка алыштырырга керештеләр.

Күчмә киңәшмәдә шулай ук торак-коммуналь хуҗалык комитеты рәисе Василий Лысачкин, Вахитов һәм Идел буе районнары администрациясе башлыгы Альберт Салихов, «Иске шәһәр» махсус территориясе префекты Айрат Фаизов, «Иске шәһәр» ИК директоры Любовь Жукова катнашты.