БРИКС+ балалар фестивале һәм урбанистика буенча премия: Илсур Метшин Тәһранда БРИКС+ илләре шәһәрләре ассоциациясе утырышын уздырды

Тәһранда Россия, Кытай, Бразилия, Һиндстан, Индонезия, Көньяк Африка республикасы һәм Иран вәкилләре катнашында БРИКС+ илләре шәһәрләре һәм муниципалитетлары ассоциациясенең эшлекле утырышы узды. Аны Казан мэры Илсур Метшин үткәрде, ул Ассоциация рәисе булып тора. Утырышта катнашучылар Ассоциация Уставының финал тексты, комитетлар эше һәм аларның җитәкчеләре кандидатуралары турында фикер алыштылар, шулай ук урбанистика буенча премия булдыру һәм БРИКС+ илләре шәһәрләренең балалар фестивален оештыру турындагы тәкъдимне хупладылар.

Утырышта Илсур Метшин шәһәр идарәсенең иң яхшы тәҗрибәләре белән алмашу буенча нәтиҗәле механизм булдырырга тәкъдим итте, алар БРИКС+ илләре муниципалитетларына дөньякүләм күпчелек илләрдәге шәһәрләр алдында торган аеруча көнүзәк проблемаларны хәл итүдә ярдәм итәчәк, аерым алганда, заманча югары технологияле чишелешләрне гамәлгә кертү хисабына.

- Бүгенге тиз үзгәрә торган дөньяда илләр һәм БРИКС+ шәһәрләре охшаш проблемалар белән эш итә. Мәдәниятләр, диннәр һәм табигать шартлары аермаларына карамастан, без экологик проблемалар, ресурсларны сакчыл файдалану, технологияләрне нәтиҗәле һәм имин кертү зарурлыгы белән очрашабыз. Һәркем бу исемлекне дәвам итә ала дип уйлыйм. Безнең шәһәрләребезнең билгеле проблемаларын хәл итү буенча еллар буе тупланган экспертизасы бар, безгә бу эштә ярдәм итүче белгечләр, университетлар белән элемтәләр урнаштырылган. Төрле илләрнең муниципалитетлары арасындагы багланышлар гражданнарыбызның тормыш сыйфатын яхшырту өчен кирәк, — дип билгеләп үтте утырышта Казан мэры Илсур Метшин.

Утырышта сәламләү сүзләре белән шулай ук Кытай Халык чит илләр белән дуслык ассоциациясе генераль секретаре Сунь Сюэцин, Көньяк Африка җирле үзидарә ассоциациясе президенты Беке Стофиле чыгыш ясады.

Катнашучылар Ассоциация Уставының финал тексты, комитетлар эше һәм аларның җитәкчеләре кандидатуралары турында фикер алыштылар. Кандидатураларны раслау Бразилиядә Ассоциациянең гомуми җыелышында 26 майда узачак, чөнки нәкъ менә бу ил БРИКС саммитын уздыруның киләсе урыны булачак.

Муниципалитетлар өчен мөһим стимул сыйфатында Илсур Метшин урбанистика буенча премия булдырырга һәм аны үсешнең төп биш юнәлеше буенча бирергә тәкъдим итте: экологик, социаль, архитектура, яшьләр һәм цифрлы, шулай ук махсус, шәхси номинацияләр һәм гран-при.

- Әлеге премиянең төп максатлары — күренекле проектларны тану, шәһәр проблемаларын хәл итүгә яңартылган ысулларны этәрү һәм БРИКС илләре арасында хезмәттәшлекне ныгыту, — дип билгеләде Илсур Метшин.

Әйдәп баручы урбанистлардан, архитекторлардан һәм төрле дәрәҗәдәге җитәкчеләрдән бүләкләү комитеты төзергә тәкъдим ителде.

Бу Россия инициативасы утырышта катнашучылар тарафыннан хупланды. Гаризалар якын арада кабул ителә башлаячак һәм 2025 ел ахырына кадәр дәвам итәчәк. Премиянең беренче лауреатлары 2026 елда «Казаныш» Халыкара архитектура-төзелеш форумы кысаларында игълан ителәчәк.

Россия ягының тагын бер тәкъдиме Казанда фән, сәнгать һәм технологияләр өлкәсендә БРИКС илләре шәһәрләренең балалар фестивален уздыру булды.

Аның концепциясен Казан вице-мэры Евгения Лодвигова тәкъдим итте. Фестиваль белем бирү һәм иҗат өлешен берләштерә алыр иде. Фестиваль программасына олимпиада дисциплиналары һәм халык һөнәрләре буенча мастер-класслар, спорт ярышлары, шулай ук әйләнә-тирә мохитне саклау буенча проектлар өстендә уртак эш һәм башка бик күп нәрсәләрне кертергә тәкъдим ителә.

Фестивальнең белем бирү һәм иҗат программасының һәр көнен аерым темага багышларга тәкъдим ителә. Мәсәлән, кулинария көнендә кулинария мастер-класслары узачак, анда катнашучылар мөстәкыйль рәвештә төрле илләрнең милли ризыкларын әзерли һәм татып карый алачак, ә милли костюм көнендә этник киемнәр күрсәтүне уздырачак. Фестиваль гала-концерт белән тәмамланачак, анда төрле илләрдән килгән яшь талантлар үзләренең иҗади сәләтләрен күрсәтәчәк.

- Без һәр бала үзен әһәмиятле һәм уңышлы хис итсен өчен бәйрәм һәм ярдәм атмосферасы булдырырга телибез. Балаларга Казанны бөтен матурлыгы белән күрсәтәчәкбез, экскурсияләр уздырачакбыз, шулай ук БРИКС саммиты барышында сезнең илләр лидерлары булган урыннарны күрсәтәчәкбез, — дип билгеләде Евгения Лодвигова.

Эшлекле очрашу вакытында билгеле булганча, Ассоциациянең киләсе утырышы Бразилиядә Генераль ассамблея рәвешендә узачак, анда Декларация проекты тәкъдим ителәчәк. Әлеге чара 2025 елга БРИКСның рәсми календаренә кертелгән, бу аның статусын сизелерлек күтәрә. Декларация кабул ителгән очракта, аны Ассоциация исеменнән Илсур Метшин Бразилия муниципалитетлары ассоциациясе президенты, Марика шәһәре мэры Вашингтон Куакуа белән бергә июль аенда Рио-де-Жанейрода дәүләт башлыклары белән БРИКС саммитында тәкъдим итәчәк.

Шунысын да билгеләп үтәргә кирәк, кабул итүче як тәкъдиме буенча утырыш Иранның иң биек бинасы Milad tower-да узды. Аның биеклеге 435 метр тәшкил итә, төзелеш 2007 елда тәмамланган.

Эш төркеме утырышы азагында анда катнашучылар Milad tower бакчасында тынычлык символы буларак роза куаклары утырттылар.

Исегезгә төшерәбез, БРИКС+ илләре шәһәрләре мэрлары ассоциациясе Казанда 2024 елның июнендә оештырылган иде. Аны булдыру инициативасы белән Татарстан башкаласы мэры Илсур Метшин чыгыш ясады. Оештыру җыелышында 200дән артык мэр, вице-мэр һәм муниципалитетлар ассоциациясе лидерлары катнашты, бу җирләрдә 2,6 млрд кеше яши.