Илсур Метшин Һиндстанда БРИКС илләре шәһәрләре ассоциациясе утырышында Казан делегациясен җитәкләде

Һиндстан башкаласы Нью-Дели шәһәрендә БРИКС илләренең шәһәрләре һәм муниципалитетлары ассоциациясе утырышы уза. Бүген Ассоциациянең төрле комитетлары кысаларында эшлекле очрашулар узачак, ә иртәгә – Генераль ассамблея. Анда катнашучылар арасында Россия, Һиндстан, Бразилия, Көньяк Африка Республикасы, Эфиопия һәм башка шәһәрләрнең 50 мэры бар. Казанны Халыкара форумда шәһәр мэры Илсур Метшин җитәкчелегендәге делегация тәкъдим итә. Бүгенге көн программасының төп вакыйгасы булып БРИКС илләре шәһәрләре мэрлары диалогы булды, аның модераторы – Ассоциациянең мактаулы рәисе Илсур Метшин.

Ассоциация Нью-Делида мэрлардан тыш, шәһәр проблемалары белән эшләүче муниципаль оешмалар җитәкчеләрен, югары уку йортлары, фәнни үзәкләр вәкилләрен җыйды. Шулай итеп, Һиндстан ягыннан чарада бөтен Һиндстан җирле үзидарә институты генераль директоры Джайрадж Пхатак (Һиндстанның барлык шәһәрләре һәм муниципалитетлары өчен җаваплы оешма), Дели мэры Шри Раджа Икбал Сингх, Һиндстанның элеккеге президенты Шри Рамнат Ковинд катнаша. 

Россия делегациясен Бөтенроссия җирле үзидарәне үстерү ассоциациясе рәистәше Ирина Гусева җитәкли. Россияне шулай ук Тула башлыгы Алексей Эрк, Ханты-Мансийск башлыгы Максим Ряшин, Рязань башлыгы Татьяна Панфилова, Тверь шәһәре Думасы рәисе Евгений Пичуев, Екатеринбург шәһәре Думасы рәисе Анна Гурарий, Краснодар башлыгы Евгений Наумов, Ростов-на-Дону шәһәре Думасы рәисе Лидия Новосельцева һәм башкалар тәкъдим итә. 

Татарстаннан чарада Түбән Кама мэры Радмир Беляев, Казан вице-мэры Евгения Лодвигова, баш архитектор Илсөяр Төхвәтуллина, Туризмны үстерү комитеты рәисе Александр Шавлиашвили, Казан мэры киңәшчесе Дарья Санникова һәм башкалар катнаша. 

Ачылу тантанасында Илсур Метшин кабул итүче якка кунакчыллыклары өчен рәхмәт белдерде. 

«Россия шәһәре мэры буларак, мин Россия һәм Һиндстанның күп кенә халыкара һәм төбәк проблемаларына охшаш карашларда булуын ышаныч белән әйтә алам, аерым алганда, ике як та гаделрәк дөнья тәртибен төзү өчен күптөрлелекнең мөһимлеген ассызыклый», – дип билгеләде Илсур Метшин. 

Джайрадж Пхатак көнүзәк проблемалар турында фикер алышу һәм төрле илләр вәкилләре арасында уңышлы тәҗрибәләр белән алмашу өчен Ассоциациянең әһәмиятен билгеләп үтте. Ирина Гусева тәҗрибә уртаклашу өчен халыкара хезмәттәшлекнең мөһимлеген билгеләп үтте. Конья мэры Ибраһим Угур Алтай, «Берләшкән шәһәрләр һәм җирле хакимиятләр» Бөтендөнья Ассоциациясе исеменнән чыгыш ясап, җирле проблемаларны хәл итүгә киң якын килүнең мөһимлеге һәм белемнәр белән алмашу өчен челтәрләр булдыру кирәклеге турында әйтте. 

Бүген программаның төп вакыйгасы – БРИКС илләре шәһәрләре мэрлары диалогы, аның модераторы – Илсур Метшин. 

Әңгәмә барышында катнашучылар заманча зур шәһәрләр алдында торган гомуми катлаулы бурычлар буенча фикер алыштылар. Илсур Метшин үз чыгышында билгеләп үткәнчә, бүген шәһәрләр дөньякүләм турбулентлык шартларында эшли, ул югары яраклашу һәм идарә итү карарларының сыгылмалылыгын таләп итә. Казан башлыгы ТР башкаласының яңа икътисадый һәм технологик мәсьәләләргә, шул исәптән тәэминат чылбыры өзелүгә һәм шәһәр системаларының цифрлы тотрыклылыгын тәэмин итү зарурлыгына ничек җавап бирүе турында сөйләде. 

«Шәһәрнең үзгәрешләргә ни дәрәҗәдә тиз җавап бирергә, үз икътисадын җайлаштырырга сәләтле булуы мөһим. Россиягә каршы санкцияләр кертү белән без үзебездә тәэминат чылбырының өзелүен кискен тойдык. Муниципаль ресурслар белән тәэмин итүче предприятиеләрнең җиһазларына ничек хезмәт күрсәтергә һәм төзәтергә дигән сорау туды. Чит ил программа тәэминатына һәм «тимер»гә бәйлелек шәһәр системалары эшендә өзеклекләр куркынычы белән янады, һәм безнең алда цифрлы тотрыклылык мәсьәләсе килеп басты. Татарстанның кардәш илләре белән безнең рәисебез Рөстәм Нургали улы Миңнеханов катнашында төзелгән актив халыкара элемтәләре нәтиҗәсендә без кыска гына вакыт эчендә кайдадыр параллель импорт төзи алдык, кайдадыр импортны үзебезнең продукция белән алмаштыру юлы белән коткарып калдык, бу безнең икътисадны көчәйтте генә. Шәһәр идарәсенең күп кенә процессларын үзгәртеп корырга мөмкинлек биргән зур эш башкарылды», – дип билгеләде Илсур Метшин. 

Ул заманча шәһәрләр очраша торган гамәли проблемаларга аерым тукталды. Бурычлар арасында шәһәр башлыгы климат үзгәрешләренең нәтиҗәләрен, мегаполисларда чүп-чар барлыкка килүен һәм чүп-чар эшкәртүнең үсешен, шәһәрдә хәрәкәтне үзгәртә торган күп автомобильлелек, хезмәт базарының үзгәрешен атады. 

Бүген Ассоциация комитетлары үз юнәлешләре буенча җыелачак. «Шәһәрләрнең архитектура көн тәртибе» мигъмарият диалогы» , «Киләчәк формуласы: цифрлы үзгәреш» цифрлаштыру турында диалог», «Хатын-кызлар диалогы», «Шәһәр хәрәкәттә», «Туристик диалог», «Экологик диалог» темаларына сессияләр булачак. Сессияләр тәҗрибәләр алмашу һәм стратегияләр турында фикер алышу өчен мәйданчык булачак. 

Бөтен Һиндстан җирле үзидарә институты һәм Идел буе шәһәрләре Ассоциациясе арасында хезмәттәшлек турында килешүгә, шулай ук Россия һәм Һиндстан шәһәрләре арасында хезмәттәшлек турында килешүгә кул кую планлаштырылган. 

Иртәгә БРИКС илләре шәһәрләре ассоциациясе утырышы кысаларында рәислек вәкаләтләрен тапшыру тантанасы узачак: җитәкчелек циклын уңышлы тәмамлаган Бразилия эстафетаны Һиндстанга тапшырачак. Һинд ягы алдагы чорга муниципалитетлар арасында хезмәттәшлекне үстерүнең өстенлекле юнәлешләрен тәкъдим итәр дип көтелә.