Илсур Метшин – волонтерларга: «Сез – җирнең тоткасы һәм безнең горурлыгыбыз»

«Игелекле Казан» автоном коммерцияле булмаган оешмасының Калинин урамындагы 3 нче йортта урнашкан ресурс үзәгендә коммерцияле булмаган тугыз оешма эшли. Волонтерлар түләүсез бирелгән биналарда сәламәтлеге чикле кешеләргә, махсус хәрби операциядә хезмәт итүче сугышчыларга һәм аларның гаиләләренә, шулай ук авыр тормыш хәлендә калган йөкле хатыннарга, аналарга ярдәм күрсәтә. Кичә Казан мэры Илсур Метшин оешмаларның эше белән танышу һәм аларга нинди ярдәм кирәклеген белү өчен ресурс үзәгенә барып кайтты.

«Без сезгә һичшиксез ярдәм итәчәкбез, чөнки сез – «җирнең тоткасы» һәм безнең горурлыгыбыз»

«Быел «Игелекле Казан» оешмасына 10 ел булды. Без эшне битараф булмаган кешеләрдән, хәйрия оешмаларыннан һәм сезнең кебек волонтерларны берләштерүдән башлаган идек. Хәзерге вакытта «Игелекле Казан» карамагында 134 оешма бар, һәм, әлбәттә, бу безнең горурлыгыбыз, Казанның югары казанышы. Сезнең белән очрашу миңа һәрвакыт көч-куәт бирә, зур эшләргә илһамландыра. Сез махсус хәрби операциядә катнашучыларның гаиләләренә, мөмкинлекләре чикле кешеләргә, шулай ук авыр тормыш хәлендә калган әниләргә ярдәм күрсәтәсез. Бу бик мөһим эш санала. Башкала мэры буларак минем алда Казанның, чыннан да, игелекле шәһәр икәнен раслау өчен мохтаҗларга системалы ярдәм күрсәтү өчен шартлар булдыру бурычы тора. Сезгә рәхмәт сүзләрен җиткерәсем килә. Без, һичшиксез, ярдәм итәчәкбез, чөнки сез – «җирнең тоткасы» һәм безнең горурлыгыбыз», – дип мөрәҗәгать итте коммерцияле булмаган оешма вәкилләренә Илсур Метшин.

«Игелекле Казан» автоном коммерцияле булмаган оешмасы шәһәрнең коммерцияле булмаган оешмалары өчен ресурс үзәге буларак эшли. Шәһәр проектларының күбесе төрле фондлар, хәйрия оешмалары белән тыгыз хезмәттәшлек шартларында гамәлгә ашырыла.

Коммерцияле булмаган оешмаларның чараларын үткәрү өчен төп мәйданчык буларак Сеченов урамындагы 5 нче йортта урнашкан «Игелекле Казан» коворкингы, сәламәтлеге чикле балалар, аларның ата-аналары өчен өстәмә белем бирү оешмасы булган «Бергә» инклюзив үзәге сайлана. Әмма күп кенә коммерцияле булмаган оешмалар коворкинг тәкъдим итә алмаган склад биналарына да мохтаҗ булган. Әлеге мәсьәләне хәл итү өчен Казан мэры йөкләмәсе буенча аларга Калинин урамындагы 3 нче йортта 1 мең квадрат метр мәйданлы торак булмаган урыннар түләүсез файдалануга тапшырылган. Мондый мәйданда 20 гә якын волонтер оешмасы эшли ала.

Киемнәр җыю өчен яңа контейнерлар, инклюзив сәяхәтләр һәм «Махсус хәрби операциядәгеләр туры»

Тугыз оешма арасында «Хәер» дигән ярдәм үзәге дә бар. Ул кирәк булмаган кием җыю һәм аны эшкәртү инфраструктурасын үстерү эшчәнлеге белән шөгыльләнә. 2021 елдан башлап оешма 3 меңнән артык кешене кием белән тәэмин иткән, икенче тапкыр куллану максатыннан 75 тонна текстиль эшкәрткән.

Казанда әлеге үзәк шәһәрнең төрле районнарында кием җыю өчен 16 контейнер урнаштырырга һәм кию өчен яраклы киемнәрне мохтаҗларга тапшырырга ниятли. Шәһәр мэры башкалада текстиль чимал белән аңлы рәвештә эш итүне үстерүче оешмага уңышлар теләде.

Инклюзив «Үзенчәлекле тур» туризм агентлыгы сәламәтлеге чикле кешеләр өчен Казан, Татарстан буенча сәяхәтләр оештыру белән аерылып тора. Агентлык инвалид коляскаларында уңайлы хәрәкәт итүне тәэмин итә торган үзенчәлекле, тулысынча җайлаштырылган маршрутлар эшли һәм аларны гамәлгә ашыра.

2023 елда оешкан «Үзенчәлекле тур» агентлыгы хезмәтләреннән 300 гә якын инвалид кеше файдаланган, узган ел исә оешма 75 кеше өчен истәлекле мизгелләргә бай сәяхәтләр оештыра алган. Шунысы игътибарга лаек, Россиядә мондый проектның бер генә аналогы бар – ул да булса Санкт-Петербург шәһәрендә. Илсур Метшин Туризмны үстерү комитеты директоры Александр Шавлиашвилига инклюзив туризм темасын контрольгә алырга кушты.

Шул ук бинада төбәкара «Беренче ватанпәрвәр» иҗтимагый оешмасы эшли. Узган ел ул үзенең Россия буйлап беренче социаль «Махсус хәрби операциядәгеләр туры» маршрутын оештырган. Чарада Россиянең җиде төбәгеннән 75 хәрби хезмәткәр катнашкан. Оешма рәисе урынбасары Андрей Григорьев сүзләренә караганда, быел махсус хәрби операция егетләре өчен РФ Герое Александр Лапин һәм РФ рәисе администрациясе җитәкчесе Әсгать Сәфәров ярдәмендә конфессияара форум үткәрелә. Андрей Григорьев шәһәр башлыгына форумны уздыру көнендә бина һәм транспорт бирүне сорап мөрәҗәгать итте. Мэр әлеге мәсьәләне хәл итүдә ярдәм күрсәтергә вәгъдә бирде.

«Без, сезнең кирәкле җайланмалар җитештерүегез белән бергә, иң яхшы үрнәкләрне үз кулларыгыз белән булдыра алуыгыз өчен горурланабыз»

Бераз соңрак Илсур Метшин махсус хәрби операциядә катнашучыларга һәм аларның гаилә әгъзаларына ярдәм күрсәтә торган автоном коммерцияле булмаган «Дулкын» үзәге эшчәнлеге белән танышты. Аның турында мэрга Казанның Координация советы әгъзасы Мария Еремова сөйләде. Үзәк махсус хәрби операциядә катнаша торган хәрби бүлекчәләргә гуманитар йөкләр җыю һәм җибәрү, алгы сызыктан яралыларны алып чыгу өчен кулланыла торган җайланмалар (носилкалар) җитештерү, сугышчылар өчен йокы капчыклары тегү, шулай ук халыкны үз-үзенә һәм башкаларга ярдәм күрсәтү күнекмәләренә өйрәтү белән шөгыльләнә. Узган ел «Дулкын» волонтерлары махсус хәрби операция зонасына 748 носилка әзерләп тапшырган, 250 гә якын кеше ярдәм күрсәтү күнекмәләрен (дәресләр әле дә дәвам итә) үзләштергән.

«Волонтерлык ялкыны һәр кешенең йөрәгендә яши. Махсус хәрби операция башлануга күпләр моңа битараф кала алмады. Сезнең кебек иртәдән кичкә кадәр хезмәт итүче бик күп кешеләр булуы җиңүгә ышаныч тудыра, әлеге хәрби вакыйга үсеп килүче яшь буынны дөрес итеп тәрбияләргә ярдәм итә. Чынлыкта, бу Казан, республика һәм ил буенча бердәнбер очрак түгел. Без, сезнең кирәкле җайланмалар җитештерүегез белән бергә, иң яхшы үрнәкләрне үз кулларыгыз белән булдыра алуыгыз өчен горурланабыз», – дип мөрәҗәгать итте Илсур Метшин «Дулкын» волонтерларына.

Ишарәләр белән җырлау, инклюзия остаханәсе һәм гомерләре саклап калынган йөзләгән сабый

Шушында ук ишарәләр телендә җырларга өйрәтә торган «Игелекле дөнья» коллективы урнашкан. Оешма 2019 елда ишетү, күрү сәләте начарайган кешеләргә, шулай ук аларның гаиләләренә ярдәм итү өчен оештырылган. Биредә ай саен 450 дән артык кешегә ярдәм күрсәтелә. Моннан тыш, үзәк хәйрия проектларын гамәлгә ашыра: 2025 ел ахырына оешма хезмәткәрләре һәм волонтерлары авыр тормыш хәлендә калган 9 меңгә якын кешене, шул исәптән инвалидларны кайнар ризык белән тәэмин иткән.

«Сезнең көйне бу дәрәҗәдә тоемлый алуыгыз сокландыра. Сезгә «Игелекле Казан»да шөгыльләнә алырлык шартлар булдыруыбызга мин бик шат. «Игелекле Казан» һәм җитәкчегез Әдгам Юмагулов ярдәмендә көйне ишетәсез, таныйсыз», – дип билгеләп үтте Казан мэры Илсур Метшин.

Эшлекле сәфәр барышында башкала җитәкчесе йөкле хатын-кызларга, күпбалалы һәм яңа туган балалы гаиләләргә ярдәм күрсәтә торган «Умиление» үзәге эше белән дә танышты. 2025 елда аналарны яклау үзәге 724 сабыйның гомерен саклап калырга ярдәм иткән – аларның әниләре аборттан баш тарткан. 9,6 меңнән артык кеше – гуманитар, 3,7 меңнән артык хатын-кыз психологик ярдәм алган.

Әлеге ресурс үзәгендә шулай ук инклюзив «Бәхет юлдаш булсын» остаханәсен дә күрергә була. Биредә осталар, волонтерлар катнашында менталь тайпылышлары, физик үзенчәлекләре булган олылар иҗат белән шөгыльләнә. Остаханәдә әзерләнгән үзенчәлекле эшләнмәләр Зорге урамындагы сәүдә үзәгендә һәм Серов бульварындагы «Игелекле сувенир» кибетендә сатыла.

Ахырда мэр агач эшкәртү буенча инклюзив «ТатарДар» балта остаханәсенең эшчәнлеге белән танышты. Биредә агачка уеп ясау һөнәрен яңадан торгызучы 30 дан артык кул остасы шөгыльләнә. Хәзерге вакытта оешма Казанда агачка уеп ясау мәктәбен ачу мәсьәләсе белән янып йөри: мәктәптә махсус хәрби операциядә каты яраланып кайткан һәм хәрәкәт көче аз булган хәрбиләр, шулай ук сәламәтлеге чикле балалар укый алачак.

Осталар Илсур Метшинга истәлеккә татар һөнәрчесенең агач сынын, шулай ук пычак бүләк иттеләр.