Татарстан башкаласында Kazan Digital Week халыкара форумы старт алды

Татарстан башкаласында Kazan Digital Week халыкара форумы ачылды. Аның катнашучылары Россия һәм башка илләрдән 16 меңнән артык кеше булачак, шуларның 600е спикерлар сыйфатында чыгыш ясаячак. Ачылу тантанасында республика рәисе Рөстәм Миңнеханов һәм Казан мэры Илсур Метшин булдылар.

Төбәк башлыгы РФ хөкүмәте рәисе Михаил Мишустинга форумга федераль статус бирү турында карар кабул итүе өчен рәхмәт белдерде. «Бу федераль хакимият органнары җитәкчеләре, регионнардан һәм башка илләрдән хезмәттәшләр, фән һәм бизнес-бергәлек вәкилләре белән үзара хезмәттәшлекнең нәтиҗәлелеген арттырырга мөмкинлек бирде. Форум мәйданчыгында бергәләп эшләү безнең алда торган бурычларны объектив бәяләргә, хезмәттәшлек чикләрен киңәйтергә ярдәм итәчәк», – диде Татарстан рәисе һәм катнашучыларга нәтиҗәле эш һәм кызыклы эшлекле очрашулар теләде.

Исегезгә төшерәбез, форумда 100дән артык чара узачак, алар арасында – РФ цифрлы үсеш, элемтә һәм массакүләм коммуникацияләр министрлыгының, конференция һәм секцияләрнең, бәйгеләрнең стратегик сессияләре. 4 мең кв.м мәйданлы күргәзмәдә 140 дан артык стенд куелган, аларда 200дән артык алдынгы ИТ-компания үз карарларын күрсәтәчәк.

Чара «Казан Экспо» МВЦда уза. Форумны ачу тантанасында шулай ук Белоруссиянең элемтә һәм мәгълүматлаштыру министры урынбасары Анна Рябова, Төркия Республикасының сәүдә министры урынбасары Мәхмүт Гюрҗан, Төркия Республикасының сәнәгать һәм технологияләр министры урынбасары Зекерия Чешту һәм башка затлар катнашты, дип хәбәр иттеләр ТР рәисе матбугат хезмәтендә.

Kazan Digital Week форумы бишенче тапкыр уздырыла.