Казанда төзекләндерүдән соң XIX гасырның «Ак мәчете» ачылган

Бүген төзекләндерүдән соң Яңа Бистә мәчете ачылды. Эшләр 2023—2024 елларда Татарстан Республикасы рәисе теләге белән хәйриячеләр акчасына башкарылды. Ачылу тантанасында төбәк башлыгы Рөстәм Миңнеханов, ТР мөфтие Камил Сәмигуллин һәм Казан мэры Илсур Метшин катнашты.

Мәчет комплексының мәйданы 1,4 мең кв.м. Бинаның беренче катында аерым керү төркеме булган хатын-кызлар намаз залы, ә икенче катында өч заллы ир-атлар намаз залы урнашкан. Территориядә аерым юыну бүлмәсе, ашау залы һәм җылылык төене булган бина бар.

Рөстәм Миңнеханов Яңа Бистә мәчетен карап чыкты һәм мәдәни мирас объектын торгызуда катнашучыларның барысына да рәхмәт белдерде. «Уртак тырышлык белән бу гүзәл мәчетне торгызуга ирештек. Гасырлар буена торган тынлыктан соң, аның диварларында яңадан азан яңгырый. Ышанам ки, әлеге мәчет хаҗиларны һәм туристларны җәлеп итү үзәге булачак», — диде Рөстәм Миңнеханов.

Мәчетнең тарихи йөзен яңарту өчен эшчеләр совет чоры янкормаларын сүткәннәр, агач тәрәзә блоклары куйганнар, манараны торгызганнар. Бинаның нигезе һәм туфрагы көчәйтелгән. Эчке япмалар, баскычлар, түбә, тышкы һәм эчке инженерлык челтәрләре, цоколь һәм диварларны гидрофобизацияләү буенча эшләр башкарылды. Шулай ук тирә-як территория дә төзекләндерелгән, дип хәбәр итә ТР Рәисе матбугат хезмәте.

Яңа Бистә мәчете («Ак мәчет») 1801—1805 елларда төзелгән. 1928 елда гыйбадәт объектының манарасы сүтелгән, эчке планы үзгәртелгән һәм янкормалар өстәлгән. Төрле вакытта бинага мехчылар клубы, мәктәп, күрек фабрикасының административ бүлмәләре урнашкан булган. Дин тотучыларга мәчет 2002 елда кире кайтарылган, соңгы вакытка кадәр ул Казанда бердәнбер эшләмәгән тарихи мәчет булып саналган.