ТР башкаласының җәмәгать транспорты Ураза гаете көнендә 5:00 сәгатьтә эшли башлаячак

Маршрутлары мәчетләр аша уза торган җәмәгать транспорты 10 нчы апрельдә 5:00 сәгатьтә йөри башлаячак. Бу Ураза гаетен бәйрәм итү белән бәйле, дип хәбәр итте аппарат киңәшмәсендә иҗтимагый оешмалар белән хезмәттәшлек бүлеге башлыгы вазифаларын башкаручы Илгиз Сарманов.

Мәчетләрдә бәйрәм чаралары 6:30 да Коръән укудан башланачак. Ә 13:00 сәгатьтә шәһәр халкын Иске Татар бистәсендә һәм Кремль яр буенда (ТР Милли китапханәсе янында) көтеп торачаклар, анда концертлар, мастер-класслар, хәләл-маркетлар һәм фуд-корт оештырыла.

Җәмәгать тәртибен тәэмин итү өчен барлык оператив хезмәтләр җәлеп ителәчәк.

«Хокук саклау органнарыннан дин тотучыларның иминлегенә зур игътибар бирүләрен сорыйм», – дип йөкләде мэр Илсур Метшин.

Исегезгә төшерәбез, ТР рәисе указы нигезендә 10 нчы апрель – эшләми торган бәйрәм көне. Иртәгә казанлыларның эш көне яки сменасы бер сәгатькә кыскарачак.

Юлия Летникова