И.Метшин: «Казанда 12 олимпия чемпионын күрү – зур уңыш ул»

Казанда 1 марттан чаңгы ярышлары буенча Россия чемпионаты старт алды. Ил чаңгычылары өчен төп стартны шәһәр беренче тапкыр кабул итә. Ярышлар Мирный бистәсендә чаңгы-биатлон комплексында уза һәм 9 мартка кадәр дәвам итәчәк. Вакыйгада Россиянең 35 төбәгеннән 200 әйдәп баручы спортчы катнаша. Бу хакта эшлекле дүшәмбедә физик культура һәм спорт комитеты рәисе Линар Гарипов сөйләде.

«Казанда 12 олимпия чемпионын күрү – башлап җибәргән чаңгычылар, шулай ук әлеге искиткеч спорт төрен яратучылар өчен зур уңыш ул», – дип билгеләп үтте Казан мэры Илсур Метшин. «Алда бу зур вакыйганы күрү өчен бер атна вакыт бар. Барлык теләүчеләрне чакырабыз. Ә спортчыларга шома чаңгы юлы телик, иң көчлесе җиңсен», – дип йомгаклады шәһәр башлыгы.

Спортчылар алты дисциплинада медальләр өчен көрәшәчәк. Ярышта катнашучылар арасында 12 олимпия чемпионы катнаша. Алар арасында – Наталья һәм Александр Терентьевлар, Алексей Червоткин, Сергей Ардашев, Татьяна Сорина, Сергей Устюгов. Стартка шулай ук ТР чаңгы мәктәбе тәрбияләнүчесе, Сочидагы Олимпия уеннары призеры Андрей Ларьков һәм «Чаңгы короле», өч тапкыр Олимпия чемпионы һәм ике тапкыр Дөнья кубогы иясе Александр Большунов кушылачак.

Узган ял көннәрендә 20/20 км дистанциядә һәм катнаш эстафетада скиатлон узды. Киләсе старт 4 мартта узачак – спортчылар классик стиль белән спринтны йөгерәчәк.

Пәнҗешәмбе, 6 мартта, ирекле стиль белән 10 км га индивидуаль узышу планлаштырылган. Ә 8 марта команда спринты узачак. 9 мартта чемпионат 4х7,5 км мавыктыргыч узыш-эстафетасы белән тәмамланачак.

Чаңгы узышлары буенча Россия чемпионатын илнең төп спорт телеканалы – «Матч ТВ» трансляцияләячәк. Тамашачылар һәм җанатарлар өчен төрле активлык, шоу-программа, призлар уйнату һәм бушлай кайнар туклану әзерләделәр.

Шәһәр кешеләренә һәм шәһәр кунакларына уңайлы булсын өчен, ярышлар урыннарына кадәр һәм кире кайту өчен ярты сәгать саен бушлай шаттллар йөри. Транспорт ике паркингтан – «129 нчы мәктәп» һәм «Каенлык Сабантуй мәйданы» тукталышларыннан китә.

Линар Гарипов шулай ук узган ярышларга нәтиҗә ясады һәм якындагы спорт вакыйгалары турында сөйләде. Әйтик, февраль ахырында «Йөзьяшәрләр уеннары. Яшәү яме» спартакиадасының чаңгы узышлары буенча финал ярышлары тәмамланды. Чарада алтын яшьтәге 500 кеше катнашты, иң өлкән катнашучыга 84 яшь иде. «Яшәү яме» проекты катнашучылары арасында ярышлар нәтиҗәләре буенча 144 медаль һәм 60 кубок уйнатылды.

Чаңгы сезоны азагында Казан чаңгы марафоны узачак. Ярышлар 15 мартта Локомотив стадионында старт ала. Спортчыларга 30 һәм 50 км дистанцияне узарга туры киләчәк.

Марафонга гаризаларны Россиянең 39 төбәгеннән 500 кеше биргән инде. Язылу дәвам итә, катнашу өчен сылтама буенча теркәлергә кирәк.

Якшәмбе, 16 мартта, яшь чаңгычылар иң массакүләм яшүсмерләр марафонында катнашачак. Вакыйга кысаларында меңнән артык спортчы үз осталыгын күрсәтәчәк.

Барлык спорт чаралары турында тулырак мәгълүматны физик культура һәм спорт комитетының телеграм-каналында бастырачаклар.