Казаннан Лисичанск һәм Рубежное шәһәрләрендә яшәүчеләргә 1,4 мең тоннадан артык гуманитар йөк җибәрелгән

Үзәк склад һәм ярдәм җыю пунктлары эшли башлаган көннән Казанда Татарстан тарафыннан шефлыкка алынган Лисичанск һәм Рубежное шәһәрләре өчен 1,4 мең тоннадан артык гуманитар йөк җыелган. Хәйрия эшенә предприятиеләр дә, шәһәр халкы да үз өлешен керткән. Бу хакта эшлекле дүшәмбедә социаль сәясәт идарәсе башлыгы Ирина Смирнова хәбәр итте.

«Лисичанскига гуманитар ярдәм күрсәтү юнәлешендә аерым эш алып барабыз. Евгений Анатольевич Варакин [ТР вице-премьеры], коллегаларыбыз белән элемтәдә торабыз. Ел башыннан ике автоколонна җибәрелде. Гуманитар ярдәм җыю пунктлары эшләвен дәвам итә. Иң мөһиме – шәһәр халкы, зур һәм кече бизнес предприятиеләре, шәхси эшмәкәрләр булдыра алганча ярдәм күрсәтәләр. Без бу эшне алга таба да дәвам итәчәкбез», – дип билгеләп үтте мэр Илсур Метшин.

Чираттагы гуманитар йөк партиясе Казаннан март аенда китте. Ул вакытта Лисичанск һәм Рубежное халкы өчен азык-төлек, көнкүреш химиясе, медикаментлар, төзелеш материаллары, шул исәптән полимер торбалар, электр һәм су белән тәэмин итүне торгызу өчен кирәкле башка нәрсәләр җибәрелде. Йөкнең гомуми авырлыгы 30 тоннаны тәшкил итте.

Шулай ук «Нәфис Косметикс» АҖ хәйрия фонды тарафыннан хәрбиләрнең гаиләләре өчен 50 тоннадан артык азык-төлек җыелмалары һәм көнкүреш химиясе әзерләнгән.

Гуманитар ярдәм җыюда теләгән һәркем катнаша ала. Ярдәм өч юнәлеш буенча күрсәтелә: гаиләләргә, хәрбиләргә һәм шефлыкка алынган территорияләргә. Тулырак мәгълүматны казанянәшә.рф проекты сайтында табарга мөмкин.

Диана Жиленкова