Илсур Метшин: «Казанның кунакханә тармагының алгарышлары зур»

Казан «1 миллионнан артык халкы булган кунакханә бизнесын алып бару өчен иң яхшы шәһәр» номинациясендә Милли кунакханә премиясендә җиңде. Конкурс финалына 43 юнәлеш буенча 186 катнашучы чыкты. Аппарат киңәшмәсендә шәһәр мэры Илсур Метшин кунакчыллык тармагы вәкилләрен бүләкләре белән котлады.

Шәһәр башлыгы билгеләп үткәнчә, быел Казан өчен җитди сынау булды – Татарстан башкаласында «Киләчәк уеннары», БРИКС Уеннары, БРИКС+ илләре шәһәрләренең Халыкара форумы һәм БРИКС саммиты узды. «Дәүләт башлыкларын кабул итү — иң катлаулы, җаваплы һәм мактаулы мәсьәлә. Безнең кунакханә хуҗалары моны лаеклы башкарып чыктылар. Ә Казанны шундый югары рәсми дәрәҗәдә тану кыйммәт тора», — диде Илсур Метшин.

Ул билгеләп үткәнчә, Казанның кунакханә өлкәсе зур алгарышларга ия: «Без кунакханә бизнесы вәкилләре һәм ресторан хуҗалары белән кунакчыллык өлкәсен яхшырту өстендә системалы рәвештә эшлибез. Без киләчәктә дә бу тармакка зур игътибар бирәчәкбез, чөнки шәһәр хуҗалыгының төп юнәлешләренең берсе — туристлык, шул исәптән эшлекле туристлык, чөнки Казанда даими рәвештә Россия һәм халыкара масштабтагы чаралар уздырыла».

Мэр 15 ел элек Барселонага кылган сәфәре турында истәлекләре белән уртаклашты, анда ул ел саен 500дән артык чара кабул иткән зур күргәзмә үзәгендә булган. «Ул вакытта бу безнең өчен хыял иде. Әмма иң яхшы тәҗрибәләрне һәм гамәлгә ашырылган проектларны без үзебездә кабул итәбез һәм Казан барлык юнәлешләр буенча үссен өчен барысын да эшләргә тырышабыз», – дип белдерде Илсур Метшин.

Мэр Казанның меңьеллыгына кадәр туристлык букадәр үсеш алмаганлыгын, ә бүгенге көндә ул тулаем эчке продукт булдыручы, эш урыннары белән тәэмин итүче, шулай ук кертемнәр өчен «үсеп килүче алан» булган шәһәр хуҗалыгының җитди тармагына әверелде, дип өстәде.

Туристлыкны үстерү комитеты директоры Дарья Санникова хәбәр иткәнчә, Милли кунакханә премиясенә нәтиҗәләрне 22 ноябрьдә Мәскәүдә ясадылар. Җиңүчеләрне берничә этапта тавыш бирү юлы белән билгеләделәр. Халык жюрисына 75 меңнән артык кеше кергән. Аннары кунакханә һәм туристлык тармагының 17 вәкиленнән һәм профессиональ жюридан торган белгечләр төркеме тавыш бирде.

Җиңүче дипломын бүләкләү тантанасында Казан вәкиленә РФ Икътисадый үсеш министрлыгының туристлык өлкәсендә проектларны гамәлгә ашыру департаменты директоры Георгий Груша тапшырды. Шәһәр өчен бу премия кысаларында икенче бүләк — беренче мәртәбә Татарстан башкаласы бу исемне 2022 елда яулаган иде.

«Казанның җиңүе — кунакчыллыкның гомуми җиңүе. Быел кунакханә тармагына уздырыла торган халыкара вакыйгаларның күп булуы зур җаваплылык йөкләде, ә бу сәбәпле бүләк алу аеруча кыйммәтле», – диде Дарья Санникова. Ул мэрга Казанда туристлыкны үстерүгә аерым игътибар биргәннәре өчен, шулай ук шәһәр кунакханә хуҗаларына актив катнашканнары һәм нәтиҗәдә кызыксынганнары өчен рәхмәт белдерде.

Дарья Санникова сүзләренчә, соңгы 10 елда Казанда урнаштыру объектлары саны, хостеллар һәм биш йолдызлы кунакханәләрне дә кертеп, 120 берәмлеккә арткан. «Кунакханә өлкәсендә җиңү — инвесторлар өчен шәһәрнең җәлеп итүчәнлеген көчәйтүдә мөһим этап, ул ил эчендә дә, халыкара аренада да алга китү өчен яңа мөмкинлекләр ача», — дип йомгаклады ул.

Милли кунакханә премиясе Россия кунакханә ассоциациясе тарафыннан РФ Дәүләт Думасының туристлык һәм туристлык инфраструктурасын үстерү комитеты, РФ Икътисадый үсеш министрлыгының туристлыкны үстерү департаменты, Мәскәү һәм Санкт-Петербург хөкүмәте, шулай ук РФ Сәүдә-сәнәгать палатасы һәм Россия туристлык индустриясе берлеге ярдәмендә үткәрелә. Премиянең максаты — сыйфатлы булган урнаштыру чараларын үстерүгә ярдәм итү.