Казанда Россиядә җайлаштырылган бассейнлы беренче инклюзив үзәк булдыралар

«Ярдәм» мәчете комплексы базасында уникаль инклюзив үзәк төзү дәвам итә. Казан мэры Илсур Метшин инициативасы белән оештырылган проект илдә сәламәтлек мөмкинлекләре чикләнгән кешеләр өчен тулысынча җайлаштырылган беренче социаль объект булачак. 

Объект төзелеше 2024 елның июлендә башланды. 3 мең квадрат метрдан артык мәйданлы өч катлы бина бердәм тернәкләндерү комплексының бер өлеше булачак. Объект бассейнны, уку сыйныфларын һәм медицина блогын үз эченә алачак. Үзәк сәламәтлек мөмкинлекләре чикләнгән кешеләрне тернәкләндерү, укыту һәм социаль яраклаштыру өчен билгеләнәчәк «

Ярдэм» территориясендә бөтен ил өчен сынау проекты төзелә. Бу Россиядә бассейнлы беренче инклюзив үзәк булачак, аның инфраструктурасы сәламәтлек үзенчәлекләре төрле булган кешеләрнең ихтыяҗларын исәпкә ала», – дип билгеләде шәһәр мэры Илсур Метшин. 

«Ярдәм» мәчете базасында тернәкләндерү инфраструктурасын үстерү Серов урамындагы янәшәдәге территорияләрне төзекләндерү белән бергә бара. Күршедәге бульварда узган ел төзекләндерүнең икенче чираты төгәлләнде – су элементлары булган интерактив балалар мәйданчыгы, җәмәгать бакчасы һәм 590 метр озынлыктагы инклюзив велосипед юлы җиһазландырылды. Киңлекнең уңайлы булуына аерым игътибар бирелде: күрү һәм ишетү сәләте бозылган кешеләр өчен юнәлеш һәм инфраструктура чишелешләре кертелде. 

2026 елда төзекләндерү эшләре дәвам итәчәк – күл тирәсен төзекләндерү, велосипед маршрутларын озайту, агач түшәмәләр һәм яңа күзәтү мәйданчыклары урнаштыру, каскадлы су элементлары булдыру һәм Баруди урамы ягыннан өстәмә керү урыны булдыру планлаштырыла. 

Моннан тыш, бүген бульвар тирәсендәге 16 күпфатирлы йортның фасадларын төзекләндерү планлаштырылуы билгеле булды.