Сергей Рыжиков - казанлыларга: “Сез булсагыз – “Рубин” да булачак!”

(Казан шәһәре KZN.RU,  9-нчы сентябрь). Казанның “Рубин” футбол клубы капкачысы Сергей Рыжиков үзенең видеомөрәҗәгатендә җанатарларны “Локомотив”ка каршы матчта команда белән бергә булырга чакырды. Команда өчен мөһим булган матч 12-нче сентябрь көнне Үзәк стадионда узачак.

 “Хөрмәтле Рубин җанатарлары! Хәзер безнең хәлләр җиңелләрдән түгел, сез интернетта команданы күп тәнкыйтьлисез, һәм сезнең моңа хакыгыз да бар, әмма ышаныгыз, хәзерге вакытта иң яхшысы – команда белән бергә булу. Интернеттан чыгыгыз, трибуналарга кайтыгыз. Хәзер үпкәләүләрне онытыр өчен иң кулай вакыт. Сез эмблеманы кайтарырга телисезме? “Рубин”га элеккеге дәрәҗәне кайтарырга телисезме? 12-нче сентябрь көнне “Рубин” – “Локомотив” матчында күрсәтегез моны! Сез булыгыз, “Рубин да булачак”, - диде голкипер клубның рәсми сайтында урнаштырылган үзенең видеомөрәҗәгатендә.

Исегезгә төшерәбез, Россия чемпионатының башкаланың “Локомотив”ына каршы 8-нче туры матчы 19.00 сәгатьтә башланачак. Уенга билетлар сатуга чыкты.