Илсур Метшин Гадел Хөснетдиновка «Татинвестгражданпроект»ны Мактау китабына кертү турында таныклык тапшырды

Бүген Казан мэры Илсур Метшин «Татинвестгражданпроект» генераль директоры Гадел Хөснетдиновка предприятиене ТР башкаласының Мактау китабына кертү турында таныклык тапшырды. Документны Казан башлыгы «Казан Экспо» ХКҮнә тапшырды, анда бу минутларда оешманың 90 еллыгы уңаеннан тантаналы чара уза. Предприятие хезмәткәрләрен юбилей датасы белән Татарстан рәисе Рөстәм Миңнеханов котлады.

Мэр Илсур Метшин искәрткәнчә, шәһәр төзелеше һәм архитектура-төзелеш проектлаштыру өлкәсендә республиканың әйдәп баручы оешмасын Казанның Мактау китабына кертү турындагы карар ноябрьдә шәһәр Думасы президиумында Татарстанның төзелеш тармагы архитектурасы үсешенә зур өлеш керткән өчен кабул ителгән иде.

«Бүгенге чара 90 ел дәвамында сезнең искиткеч коллективның республикага һәм аның башкаласына бар күңелен, олы йөрәген һәм чын талантын кертүен чагылдыра. Шәһәрдә сезнең идеяләр белән яңа объектлар барлыкка килә. Һәрвакыт гаҗәпләнеп киләм, без бергә проектлар өстендә эшлибез, әмма сезнең фикер очышының киңлеге, хәтта сез проектлаучы мәктәпләр дә башкаларга охшамаган. Сезнең проектларыгыз шәһәрне бизи. Аларны бары тик сезнең кебек искиткеч кешеләр генә эшли ала», — диде мэр Илсур Метшин һәм «Татинвестгражданпроект» генераль директоры Гадел Хөснетдиновка предприятиене ТР башкаласының Мактау китабына кертү турында таныклык тапшырды.

«Татинвестгражданпроект»ка 1934 елда нигез салына. Шуннан бирле предприятие проектлау документларын һәм генераль планнар белән шөгыльләнде, Татарстан һәм Россиянең меңнән артык объекты өчен җирдән файдалану һәм төзелеш кагыйдәләрен формалаштырды. Институт проектлары буенча ЦУМ, Көнкүреш йорты, Төзүчеләр, Химиклар һәм Спорт сарайлары, Балалар универмагы, Сәяси мәгърифәт йорты, цирк, шулай ук Казандагы Горки-1 һәм Горки-2 торак массивлары төзелгән.

Соңгы ун елда предприятие хезмәткәрләре коммерция һәм социаль торакның мөһим объектларын, шул исәптән Салават Күпере микрорайонын проектлаганнар. Мәктәпләр һәм балалар бакчалары, мәдәният һәм сәламәтлек саклау учреждениеләре, спорт объектлары, шул исәптән «Ак Барс Арена» стадионы, Су спорт төрләре сарае, Европадагы иң эре «УРАМ» экстрим-паркы төзелде.

2019 елда WorldSkills Kazan эшче белгечлекләре буенча дөнья чемпионатын уздыруга предприятие проекты буенча «Казан Экспо» ХКҮ төзелде. Хәзер бу киң колачлы эшлекле, мәдәни, иҗтимагый чаралар уздыру өчен үзәк мәйданчык. Институтның тагын бер күренекле проекты — Бәшир Рамеев исемендәге ИТ-парк. Объект «Киләчәк уеннары» халыкара мультиспорт турнирын уздыруның төп урынына әверелде.

Хәзер «Татинвестгражданпроект»ның алыштыргысыз эшләнмәсе буенча танылган Россия һәм чит ил архитектура бюролары белән берлектә шәһәрдә Г.Камал исемендәге театрның яңа бинасының төзелеше тәмамланып килә. Моннан тыш, хәзерге вакытта оешмада Казан метрополитенының икенче сызыгы участогы проекты өстендә эшлиләр.

«Татинвестгражданпроект» инициативаларын илнең 20дән артык төбәге, шул исәптән яңа субъектлар да тормышка ашырды. Шул ук вакытта 39 икътисади нәтиҗәле проект РФ Төзелеш министрлыгы исемлегенә эләккән. Институт белгечләре ярдәмендә Евпаториядә балалар тернәкләндерү үзәге, Севастополь дәүләт университеты объектлары, Мариупольдә Азов буе дәүләт техник университеты бинасы булдырылды, Россиянең яңа төбәкләрендә күпфатирлы торак йортлар торгызылды. Предприятие көче белән генераль подрядчы һәм идарәче компания сыйфатында Кырым Республикасында «Ак Барс» балаларны савыктыру комплексы проекты уңышлы гамәлгә ашырылды.

Предприятие эшләгән елларда тармак өчен кадрлар алачыгына әверелде, анда СССРның һәм РФнең атказанган төзүчеләре һәм архитекторлары Ирек Фәйзуллин, Гадел Хөснетдинов, Герман Бакулин, Сергей Саначин, Марат Кафиатуллин, Илдус Әсәдуллин, Геннадий Пичуев һәм башкалар хезмәт куйды.

«Татинвестгражданпроект» белгечләрнең яңа буынын тәрбияләү өстендә дә эшли. 2018 елдан Казан дәүләт архитектура-төзелеш университетының талантлы студентларын ачыклау һәм бүләкләү өчен исемле стипендиягә конкурс үткәрелә.