Казан мэры БРИКС+ илләре шәһәрләре һәм муниципалитетлары ассоциациясе утырышында катнашты

Бүген иртән Марокконың Танжер шәһәрендә «Берләшкән шәһәрләр һәм җирле хакимиятләр» оешмасының Бөтендөнья конгрессы кысаларында БРИКС+ илләре шәһәрләре һәм муниципалитетлары ассоциациясенең эшлекле утырышы узды. Анда дистәләгән шәһәр мэрлары һәм муниципалитетлар һәм БРИКС илләре ассоциациясе җитәкчеләре, аерым алганда Россия Федерациясе президентының Эчке сәясәт идарәсе башлыгы урынбасары Евгений Грачев, Бөтенроссия җирле үзидарәне үстерү ассоциациясе рәистәше Ирина Гусева һәм Казан мэры Илсур Метшин катнашты. Татарстан башкаласы башлыгы, Ассоциацияне оештыру инициаторы буларак, аның мактаулы рәисе итеп сайланган иде.

Утырышта чыгыш ясап, Казан мэры Илсур Метшин шәһәрләр арасындагы горизонталь элемтәләрне ныгытуның стратегик әһәмиятен ассызыклады. Ул билгеләп үткәнчә, Ассоциация мәйданчыгы диалог өчен нәтиҗәле киңлеккә әверелде, анда муниципаль лидерлар бергәләп көнүзәк шәһәр мәсьәләләрен хәл итү юлларын эзлиләр.

«Безнең утырыш бүген «Берләшкән шәһәрләр һәм җирле хакимиятләр» оешмасының Бөтендөнья конгрессы мәйданчыгында уза, һәм бу күптөрлелекне һәм диалогка әзер булуын сөйли», – диде Илсур Метшин.

Казан мэры узган елның әһәмиятле казанышы – Ассоциация һәм «Берләшкән шәһәрләр һәм җирле хакимиятләр» оешмасы арасында килешү имзалау турында искә төшерде. Илсур Метшин сүзләренчә, бу адым БРИКС муниципаль платформасын җирле хакимият органнарының глобаль челтәрләренә берләштерергә мөһим этап булды, бу халыкара процесста тулы хокуклы катнашучылар буларак шәһәрләрнең ролен ныгытты.

Яшьләр юнәлеше турында блок чыгышның мөһим өлеше булды. Илсур Метшин Казанда 35 муниципалитеттан 150 талантлы катнашучыны берләштергән беренче БРИКС яшүсмерләр фестивален уңышлы уздыру турында искә төшерде. Катнашучыларның проектны дәвам итү турындагы күпсанлы сорауларына җавап биреп, мэр инициативаны Беларуссия хуплавын хәбәр итте.

«Беларуссия – БРИКСның партнер иле – фестивальне уздыру идеясен хуплады, һәм ул киләсе елның язында Минскта узачагын сезгә хәбәр итүемә шатмын. Шулай булгач, балаларга шатлыклы яңалык җиткерергә була: фестиваль яши, һәм тиздән барысы да бу проектка кушылырга чакыру алачак»,– дип билгеләде Казан шәһәре башлыгы.

Шулай ук Төркиянең Конья шәһәре мэры, «Берләшкән шәһәрләр һәм җирле хакимиятләр» оешмасының башкарма президенты Угур Ибраһим Алтай «Берләшкән шәһәрләр һәм җирле хакимиятләр» оешмасы һәм Ассоциациянең хезмәттәшлек вариантларын тәкъдим итте. Көньяк Африка җирле үзидарә ассоциациясе президенты Беке Стофиле социаль проблемаларны хәл итү тәҗрибәсе белән уртаклашты. Бразилия муниципалитетлары ассоциациясе башкарма директоры Эдуардо Тадеу БРИКС шәһәренең Бразилия муниципалитетлары белән нинди юнәлешләр буенча хезмәттәшлек итә алулары турында сөйләде, ә сәламәтлек саклау системаларын ныгыту буенча консультант Адельсон Гуарачи Янч беренчел медик-санитар ярдәм өлкәсендәге тәҗрибәсе белән уртаклашты.

Ассоциациядә Тәһран мэрының Халыкара мөнәсәбәтләр буенча урынбасары Мөхәммәдали Шәфины аерым тыңладылар, ул Иран шәһәрләрендә АКШ һәм Израиль тарафыннан хәрби гамәлләр белән бәйле авыр вәзгыять турында сөйләде.

БРИКС әгъзалары булмаган илләр дә – Мексика һәм Аргентина мэрлары актив катнашты. 

Евгений Грачев үз мөрәҗәгатендә: «Ассоциация составындагы һәр муниципалитет үзенчәлекле, әмма барысының да максаты бердәм – халыкның иминлеген тәэмин итү. Җирле хакимият дәрәҗәсендә хезмәттәшлек – дипломатиянең мөһим юнәлешләренең берсе», – дип билгеләде Евгений Грачев.

Ул мондый тәҗрибә белән уртаклашу һәм БРИКС+ илләре шәһәрләре арасында «тере» диалог дөнья җәмәгатьчелеге өчен кирәкле булуы турында ышаныч белдерде.

Бөтенроссия җирле үзидарәне үстерү ассоциациясе рәистәше Ирина Гусева халыкара хезмәттәшлекнең тиз үсүенә басым ясады.

Ул географик һәм мәдәни аерымлыкларга карамастан, шәһәрләр охшаш мәсьәләләр белән эшли – төзекләндерүдән һәм транспорттан алып цифрлаштыруга һәм социаль сәясәткә кадәр. Шуңа күрә иң яхшы тәҗрибәләр белән уртаклашу катнашучылар өчен иң нәтиҗәле үсеш коралы булып тора.

Чыгыш азагында Ирина Гусева утырышта катнашучыларны профессиональ диалогны Мәскәүдә дәвам итәргә чакырды. GСезне 2026 елның 23–24 ноябрендә Мәскәүдә узачак Халыкара муниципаль форумда катнашырга чакырам. Форум 5 меңнән артык катнашучыны һәм 2 меңнән артык Россия һәм чит ил шәһәрләре һәм төбәкләреннән вәкилләрне берләштерәчәк, халыкара муниципаль диалог өчен иң эре мәйданчыкларның берсенә әвереләчәк», – диде ул.

Исегезгә төшерәбез, БРИКС+ илләре шәһәрләре һәм муниципалитетлары ассоциациясе 2024 елның июнендә Казан мэры Илсур Метшин инициативасы белән Казандагы Халыкара форумда оештырылды, ул төрле илләрдән, шул исәптән БРИКС+ дәүләтләре һәм аларның партнерларыннан 18 меңнән артык шәһәр һәм муниципалитетны берләштерде. Ассоциация үзенең максаты итеп муниципаль идарә өлкәсендә алдынгы тәҗрибәләрне уртаклашуга, тормыш сыйфатын яхшыртуга һәм шәһәрләрнең икътисадый һәм социаль үсешен күтәрергә ярдәм итүне куя.

Марокконың Танжер шәһәрендә муниципалитетлар вәкилләре өчен иң эре халыкара оешма – «Берләшкән шәһәрләр һәм җирле хакимиятләр» Бөтендөнья конгрессы уза. Кичә Илсур Метшин «Берләшкән шәһәрләр һәм җирле хакимиятләр» Бөтендөнья оешмасының Евразия бүлеге Генераль ассамблеясендә Казанда инклюзив мохит төзү буенча тәҗрибәсен тәкъдим итте, шулай ук шәһәр башлыгы яңадан «Берләшкән шәһәрләр һәм җирле хакимиятләр» Бөтендөнья оешмасының Евразия бүлеге президенты постына сайланды.