И.Метшин: «Казанда юл эшләре гөрли: 204 участок тәртипкә китерелә»

Бүген Казан мэры Илсур Метшин агымдагы елдагы иң эре юл проектларының берсен — Рахлин, Нокса, Зирекле урамнарында һәм Дорожный тыкрыгында бара торган төзекләндерү эшләренең барышын тикшерде. Алар бергәләп 3,4 чакрым озынлыктагы ярымбоҗра хасил итә, ул Мамадыш тракты белән Җиңү проспектын Константиновка, Кече Клыки, Царицынский бугор бистәләре, шулай ук «Светлая долина», «Green», «Лето» һәм «Нокса Парк» торак комплекслары аша тоташтыра. Транспорт үтемлелеге яхшырганны якынча 30 мең казанлы күрәчәк. Моннан тыш, «Светлая долина»га уңайлырак керү өчен, Натан Рахлин урамын дүрт полосага кадәр киңәйтәләр.

«Казанда юл эшләре гөрли: быел без 204 юлны тәртипкә китерәбез. Иң әһәмиятле проектларның берсе Совет районында гамәлгә ашырыла — озынлыгы 3,4 чакрым булган юлны төзекләндерәбез. Без Мамадыш тракты белән Җиңү проспектын тоташтырабыз, шулай итеп өч бистә һәм дүрт торак комплексы халкы өчен уңайлы үтү юлы булдырабыз. Гомумән алганда, бу үзгәрешләр 30 меңнән артык казанлының тормышын җиңеләйтәчәк. Эшләр тәмамланганнан соң, биредә заманча яктырту һәм имин җәяүлеләр кичүе барлыкка киләчәк, шулай ук яңа автобус маршруты эшләтеп җибәреләчәк, бу исә әлеге микрорайоннарда яшәү сыйфатын шактый яхшыртачак», – дип хәбәр итте Илсур Метшин.

Бүген дүрт объектта — Натан Рахлин, Нокса, Зирекле урамнарында һәм Дорожный тыкрыгында эшләр алып барыла. Натан Рахлин урамында планлаштырылган күләмнең яртысыннан күбрәге (56%) үтәлгән — бу шәһәрнең башка участокларына караганда сизелерлек яхшырак нәтиҗә. Шул ук вакытта Нокса (40%), Зирекле (37%) һәм Дорожный тыкрыгында (32%) эшләр билгеләнгән тәртиптә бара.

Урамнарда асфальтны яңарталар, барлык участокларда юл өслеген алыштыру, яңа җәяүлеләр юлы салу һәм элек булмаган урыннарда тышкы яктырту терәкләре урнаштыру каралган.

Натан Рахлин урамына аерым игътибар бирелде. Төзекләндерү эшләре башланганчы урамның юлы турында халыкның шелтәләре күп булган. Җәяүлеләр өчен аерым йөрү юлы булмау кешеләрне хәрәкәт итүче транспорт белән янәшә юл читеннән барырга мәҗбүр иткән. Моннан тыш, Мамадыш трактына чыгу юлында даими рәвештә җитди тоткарлыклар килеп чыга. Ике юнәлешле хәрәкәт аркасында, яшел ук кабынгач, борылыш ясаучы автомобильләр төп агымга тоткарлык ясый.

Әлеге мәсьәләне хәл итү өчен, Мамадыш трактыннан алып «Светлая долина» торак комплексына кадәр 150 метрга якын участокны икедән дүрт полосага кадәр киңәйтәләр. Бу олы юлга чыгу өлешендә машиналарның үтү мөмкинлеген шактый арттырачак һәм машина агымы күп булганда озак вакытлы бөкеләр хасил булу вәзгыятен бетерәчәк.

Натан Рахлин урамында эшләр июнь ахырында башланды, аларны август ахырына төгәлләү планлаштырыла.

Казан федераль университетының ботаника бакчасына чыга торган Зирекле урамында юл нигезен тулысынча яңарталар, яңа юл өслеге салалар һәм тротуарларны төзекләндерәләр. Нокса урамында һәм Дорожный тыкрыгында шулай ук юл өслеген тәртипкә китерәләр һәм яңа тротуарлар салалар.

Дүрт объект та бердәм транспорт үткәргечен тәшкил итә. Ул Совет районы торак массивларын шәһәрнең төп магистральләре — Җиңү проспекты һәм Мамадыш тракты белән бәйләячәк.

Төзекләндерү тәмамлангач, яңа транспорт үткәргеченнән автобус маршрутын җибәрү мөмкинлеге булачак. Шуның ярдәмендә Константиновка, Кечкенә Клыки һәм Царицынский бугор торак комплексларында яшәүчеләр Казанның башка районнарына турыдан-туры һәм уңайлы йөрү мөмкинлеген алачак.

Юл челтәре шәһәрнең башка торак массивларында да яңартыла. Быел гомуми озынлыгы 40 чакрым чамасы тәшкил иткән 85 юлны тәртипкә китерү каралган, ягъни 30 бистәдә эшләр башкарыла. Алар арасында Северный, Залесный, Мирный, Яңа Сосновка һәм башкалар бар. 24 участокта ремонт эшләре төгәлләнгән, 17сендә эшләр дәвам итә. Эшләрнең гомуми әзерлеге 39% тәшкил итә.

Шул ук вакытта шәһәрнең торак массивларында тышкы яктыртуны торгызу программасын гамәлгә ашыралар. Казанның 18 бистәсендә 40 млн сумлык 1 мең яктылык – диодлы энергия саклаучы яктырткычлар куюны дәвам итәләр.

Исегезгә төшерәбез, узган ел торак массивларда рекордлы 91 юл участогын яңарттылар.

Быел урам-юл челтәрен ремонтлау барлыгы 100 чакрым озынлыктагы 204 участокка кагыла. Бу эшләргә 27 млрд сумнан артык акча бүлеп бирелгән.

«Тормыш өчен инфраструктура» илкүләм проекты кысаларында 7,5 чакрым озынлыктагы 14 юл участогы төзекләндерелә. Юлларның асфальт-бетон өслеген, җәяүлеләр юлын төзекләндерәләр, юл билгеләре, куркынычсызлык киртәләре, ясалма юл тигезсезлекләре һәм башка элементларны урнаштыралар. Программа 85% ка үтәлгән.

Илкүләм проекты буенча Максимов урамы, Маршрут урамы, Можайский урамы, Александр Пархоменко урамы, Галимҗан Баруди урамы, Гудованцев урамы, Хөсәен Мәүлүтев урамы, Натан Рахлин урамы, Минск урамы, Академик Завойский урамы буенча юл йөрү өлешләре, Мамадыш трактындагы, Зур Клыки бистәсендәге Трудовая һәм Октябрь урамнары буенча тротуарлар яңартылачак.

Моннан тыш, асфальт-бетон катламнары нык тузган 32 юл участогында өслекләрне алмаштыралар. Гомуми озынлыгы якынча 36 чакрым тәшкил иткән кимчелекле урамнар исемлегенә Ямашев проспекты, Клара Цеткин урамы, Восстание урамы, Гудованцев урамы, Карбышев урамы, Җиңү Проспекты, Себер тракты, Маршал Чуйков урамы, Беломорск урамы һәм башкалар кергән. Эшләр 78% ка башкарылган.

Урам-юл челтәрен комплекслы ремонтлау 21 чакрым озынлыктагы 26 участокта планлаштырылган. Бу эшләр юнәлеше Яңарыш, Нокса, Крутов, Рассветная, Чирмешән, Зирекле, Заслонов, Төзүчеләр урамнарындагы юлларга һәм Чернышевский, Пушкин урамнарындагы тротуарларга караган.

Шулай ук Россия – АСЕАН саммитына гомуми мәйданы 199 мең кв.м булган җиде кишәрлек яңартылган.

Күчмә киңәшмәдә Башкарма комитет җитәкчесе урынбасарлары Игорь Куляжев, Илдар Шакиров, шулай ук Совет районы Башлыгы вазыйфаларын башкаручы Андрей Яковлев катнашты.